Job 13

Iob i tur padikat ure kana dovot na mangamangana

1Ea, a kiau na matagu i ga gire go parika,
Ma ra talingagu i ga valongore, ma i ga kapa tana.
2Nam nina amutal nunure, iau bula iau nunure,
Pa iau papaua ta mumutal.
3Ia kaka, iau mainge ba amir a tata ma ra Dekdek Muka,
Ma ba amir a vartoto ma God.
4Amutal vamong ra lavur magit parika ma ra tavir,
Amutal a utul a tena valagar vakuku.
5Gala amutal a ki mut,
Gala amutal a kabinana!

6Amutal a valongore kaugu kabinana,
Ma amutal a kapupi ra tinata ta ra ngiegu.
7Dave vang, amutal a tur maravut God ma ra tinata ba pa i takodo,
Amutal a varvai vavaongo vang ure?
8Dave, amutal a varkurai maravut ia,
Ma amutal a vartoto ure God?
9Dave, na boina ba na tikan milat ta ra bala i mumutal?
Amutal a valunga pa ia laka da di valunga ra tutana?
10A dovotina na pit amutal,
Ona amutal ru ia ma ra vaongo.
11Dave, pa amutal burut laka ure kana minamar,
Ma pa amutal dadadar ta ra luaina matana?
12Kamumutal umana tinata valavalar dia da ra kabu na iap,
Kamumutal umana tinata na balbali dia da ra bakbakit na pia bulit.
13Amutal a ki mut, ma amutal a nur vue iau, upi ina tata,
Ba a boina ba a kaina i tadav iau.
14A pakagu i da ka ra nian piragu,
Ma kaugu nilaun da ra magit vakuku ta ra limagu.
15Iau ki pa ia pi na ubu iau, la kaka, ina vartoto ure kaugu mangamangana ta ra luaina matana.
16Pa ta tena varpiam na pot ta ra luaina matana,
Go iat kaugu varvalaun.
17Amutal a valongore ilam ra magit par ba iau tata ure,
Boina ba kaugu tinata na bang ta ra talinga i mumutal.
18Iau tar mal bulu kapi kaugu vavaarikai,
Iau nunure ba iau takodo.

19Gala ta tikai na tata ure iau,
Gala ina ki mut ma ina vung vue ra tulungeagu.
20Una tul tar ra ura magit ika tagu,
Ma pa ina parau kan ra matam:
21Una tak vakakit vue ra limam kan iau,
Ma koko una vaburut iau.
22Damana ina torom ba u oro pa iau,
Ma una valongore iau ba iau tata piram.
23Aivia bar kaugu umana kaina mangamangana ma kaugu umana nirara?
Una ve vakapa iau ure kaugu varpiam ma kaugu nirara.

24Ta ra ava u ive ra matam,
Ma u vakilang iau ba iau kaum ebar?
25Dave, una vaburut ra mapina davai nina ra vuvu i kavkavie,
Ma una korot mur ra maranga na mapina kunai?

26U tumu vake ra umana magit dia mapak ure iau,
Ma u vakale iau ma ra umana nirara ta kaugu kini na barmana.
27U vung ra ura kaugu ta ra babat keke, ma u makmakile kaugu lavur nga;
U tumu kikil ra ura pal a kaugu.
Iau da ra davai i marapurap,
Da ra mal a po na vui i enen ia.
28